Бөгүн, сентябрь 8-те, Самагалтай суурнуң үндезилеттингенинден бээр
250 чыл болгаш Тес-Хем кожууннуң тургустунганындан бээр 100 чыл болган оюнга тураскааткан VII дугаар «Аранчын аттыг номчулгалары» деп эртем-практиктиг конференция болуп эрткен.
Ук конференцияны Тыва Республиканың Чазааның чанында Тываның гуманитарлыг болгаш социал-экономиктиг эртем-шинчилел инстиду, Тес-Хем кожууннуң чагыргазы болгаш Ю.Л Аранчын аттыг фондунуң удуртулгазы демнежип эрттирген. «Төөгү, этнография база археология» болгаш «Филология, культурология, шажың-чүдүлге» деп секциялар ажылдаан. Ниитизи-биле эртем ажылдакчылары, башкылар база өөреникчилер 25 кижи тус-тузунда секцияларга солун илеткелдерни кылган.
Хүндүлүг эртемденнерге болгаш келген аалчыларга школавыстың ханаларындан аңгы-аңгы чылдарда өөренгеш дооскан доозукчуларывыстың фотоальбомнарының делгелгезин кылгаш таныштырган. Школавыска аалдап келген чонга 1986 чылда тургустунган музейниң төөгүзүн, экспонаттарын экскурсовод өөреникчилер Серендоо Валерьяна, Тирчин Шончалай, Дамбыра Виолетта, Чооду Анастасия таныштырган.
Бистиң школавыстың доозукчулары эртемденнеривис: филология эртемнериниң кандидаттары — Самдан Зоя Баировна, Мижит Людмила Салчаковна, Симчит Кызыл-Маадыр Авый-оолович,
көдээ-ажыл агый эртемнериниң кандидады — Балчир Борбак-оол Балчарович төрээн школазынга келгени өөрүнчүг болду. Зоя Баировна школавысты доозупканындан бээр 55 чыл бооп турарын,маңаа өөренип чораан школачы үелерин чылыг, чымчак сактыышкыннары-биле үлешкени солун болган. Мындыг хевирлиг конференциялар өөреникчилеривистиң чогаадыкчы чоруун сайзырадырынга, эртемге сундулуун бедидеринге улуг рольдуг дээрзин демдеглээри чугула.

#школа1 #учёба #тесхемский #министерствообразования #ТИГПИ